WANAWAKE WADAIWA KUWAAMBUKIZA VVU KWA MAKUSUDI VIJANA WA IBUMU KILOLO

  (Zahanati ya Ibumu)

Diwania wa kata ya Ibumu, Hemed Mbena

 

BAADHI ya wanawake wenye maambukizi ya virusi vya Ukimwi (VVU) wa kijiji cha Ibumu wilayani Kilolo mkoani Iringa wameelezwa kuwaambukiza kwa makusudi vijana wenye tamaa ya kupata fedha kutoka kwao.

Taarifa za wanawake hao ambao hata hivyo hawakutajwa majina yao katika mtandao huu zimeelezwa kuripotiwa kwa uongozi wa serikali ya kata ya Ibumu kilipo kijiji hicho.

Muuguzi wa Zahanati ya Kijiji hicho, Spesioza Fivao alisema pamoja na kushitakiwa, wanawake hao ambao baadhi yao wanapata huduma ya dawa za kupunguza makali ya VVU (ARV) katika kituo chao wameendelea kuwachangamkia vijana hao.

Fivao alisema; “hili sio jambo la siri, unajua kwa kijiji kidogo kama hiki tunajuana, na baadhi ya watu wenye maambukizi hayo wanajulikana, pamoja na hayo yote wanachangamkiwa na vijana hao kwasababu wanadaiwa kutoa pesa zinazowawezesha vijana hao kujikimu kimaisha.”

Diwani wa kata hiyo, Hemed Mbena amethibitisha kuwepo kwa changamoto hiyo inayozidisha kasi ya maambukizi ya VVU katika kata yake.

Mbena alisema baadhi ya vijana hao wametumbukia katika tatizo hilo kwasababu tu ya kununuliwa pombe na wanawake na wanaume wenye maambukizi hayo.

Alisema wengine wanaishi kama mume na mke pamoja na kwamba wakati wakikutana kwa mara ya kwanza mmoja wapo alikuwa hana maambukizi hayo.

Mwaka 2011, Wizara ya Katiba na Sheria iliahidi kuwachukulia hatua kali watu watakaobainika kueneza  kwa makusudi virusi vya Ukimwi kwa watu wengine.

Sheria ya kudhibiti na kupambana na virusi vya Ukimwi na Ukimwi, kifungu cha 176 cha kanuni ya adhabu (penal code), sura ya 16 kinaeleza wazi kuwa ni kosa la jinai kwa mtu yeyote ambaye bila uhalali au kwa uzembe, anafanya kitendo chochote ambacho anajua kuwa kitasababisha kuenea kwa ugonjwa hatari wa binadamu.

Anayepatikana na hatia kwa mujibu wa sheria hiyo anaweza kufungwa kifungo cha miaka miwili, kutozwa faini au vyote viwili.

Wakati huo huo serikali imeendelea kutoa wito kwa Watanzania kutoa taarifa za watu wenye kueneza magonjwa ya kuambukiza kwa makusudi wakati wakijua wazi kuwa ni kosa la jinai.

Nchini Kenya mtu anayekutwa na hatia hiyo anaweza kuhukumiwa  hadi miaka 15 jela.