BIASHARA YA USAFIRI WA BODA BODA YASHUKA JIJINI DAR ES SALAAM

Dereva boda boda wakiwa wamelala juu ya boda boda zao wakisubiri abiria jijini Dar es salaam.

Mnamo Machi 10 mwaka huu operesheni ya kukamata waendesha Pikipiki zenye magurudumu mawili maarufu kama bodaboda na zile zenye magurudumu matatu maarufu kama bajaji, ilianza kwa wale wanaokiuka agizo la kutoingia katika eneo la katikati ya Jiji (CBD).

Hadi kufikia Machi 20 mwaka huu, bodaboda na bajaji zipatazo 1,679 zilikamatwa kwa makosa mbalimbali ya kisheria,  ambapo kufuatia hatua hiyo baadhi ya Wafanyabiashara wa usafiri huo  jijini humo wameeleza kuwa soko la usafiri huo kwa sasa limeyumba kwa kiasi kikubwa.

Aidha wafanyabishara wametoa kilio chao  kwa sababu ya kushuka kwa mapato yao ya kila siku, baada ya kuzuiliwa kusafirisha abiria kuelekea katikati ya Jiji.

Kwa upande wa Wajasiriamali waliokuwa wakitegemea usafiri huo, kilio chao kimekuwa ni kushindwa kufikisha bidhaa zao kwa wakati , katika maeneo yao ya biashara ambayo yapo katikati ya Jiji.