SERIKALI IMEENDELEA KUTOA ELIMU KWA WATENDAJI WA AFYA NA WANANCHI KWA UJUMLA

Mbu aina ya Aides anaeambukiza homa ya dengu.

Kufuatia kuongezeka kwa idadi ya wagonjwa wa Homa ya Dengu katika jiji la Dar es Salaam, Serikali imeendelea kutoa elimu kwa watendaji wa sekta ya afya na wananchi kwa ujumla, ili waweze kujikinga na ugonjwa huo, pamoja na kunyunyizia dawa kwenye maeneo yenye mazalia mengi ya mbu.

Naibu Waziri wa Afya na Ustawi wa Jamii Dk. KEBWE STEVEN KEBWE amesema, pamoja na kuchukuliwa kwa hatua hizo pia Serikali kupitia Bohari Kuu ya Madawa (MSD), imejipanga kuagiza dawa za kutosha kwa ajili ya kutibu maradhi nyemelezi na kufanyia vipimo vya homa hiyo ambayo imezua hofu kwa jamii.

Akitoa tamko kuhusu homa ya Dengi bungeni, kufuatia kuombwa kwa taarifa hiyo na mbunge wa Kigamboni Dk. FAUSTIN NDUGULILE, Naibu Waziri wa Afya amesema mpaka sasa jumla ya wagonjwa 15 bado wamelazwa, wakiwemo sita Hospitali ya Temeke, Sita Hospitali ya Amana na Wanne Hospitali ya Mwananyamala, huku jumla ya watu 458 wakiwa wameugua homa hiyo jijini Dar es Salaam tangu kuanza kwake ambapo watatu kati yao wamefariki.

Mbali na Tanzania Naibu Waziri KEBWE amesema, nchi zilizopo kwenye ukanda wa joto mara nyingi hukumbwa na homa hiyo, ambapo hivi sasa Kenya na Msumbiji pia wanakabiliwa na Homa ya Dengu.